تداعيات قرارات ترامب على الاقتصاد العالمي
الحقيقة طبعا أنا بدعوكم أن أنتم تواصلوا مشاهدة هذا الفيديو لأن التفاعل عليه رهيب إلى حتى هذه اللحظة لأن هو ده الأساس اللي بننطلق منه. اللي عمله ترامب غير طبيعي، إجراء قوي جدا كانت له تداعياته الرهيبة على مستوى الاقتصاد العالمي، لأن أمريكا برضه لا تزال هي أكبر اقتصاد في العالم.
آه الصعود الصيني صارخ وصاروخي، لكن لا تزال الولايات المتحدة الأمريكية أكبر اقتصاد في العالم وهي صاحبة الدولار. ولهذا لما أمريكا تعطس لازم العالم يجي له برد. علشان كده لما ترامب أصدر القرارات دي حصل في الأسواق الألبان على كل الأصعدة.
واللي احنا قايلينه في الفيديو قبل الألبان الأكتر اللي حصل خلال اليومين اللي فاتوا، لأن الفيديو داخل على ثالث يوم دلوقتي. اللي هو الفيديو السابق على ده مباشرة، شفتوا حضراتكم البورصات الأمريكية والأسهم على اللون الأحمر. خسائر من فبراير لغاية دلوقتي تجاوزت الـ 20%، خسائر تجاوز الـ 5 تريليون دولار، انهيار في أسعار النفط لأن في توقع لحالة من الركود.
خلاص حركة التجارة هتتوقف. الجمارك اللي هنا والجمارك اللي هنا زي ما هنقول: الصين وباقي دول أوروبا واليابان وغيره. وما يرتب الآن خلق حالة من عدم اليقين، خلق اعتقاد أن العالم كده مقبل على ركود.
ما هو لازم تنهار الأسهم، لازم تنهار أسعار النفط. هننتج لمين ما كل واحد حط قيود، كل واحد عمل جدار على حدوده. وبالتالي للشركات عملية الإنتاج عملية الاستثمار، انتقال الاستثمارات، التجارة عبر الحدود، سلاسل الإمداد، كله لازم ينهار. وبالتالي حالة من الهلع والفزع. عشان كده دي ترجمت لحالة الانهيارات.
الرد الصيني وحقائق الاقتصاد العالمي
اللي زود من الكارثة الرد الصيني. للأسف الأخ ترامب بيتصرف بمنطق الفتوة القديم أن هو الفتوة الوحيد. هو غير مدرك أن الملعب والقرية والعزبة بقى فيها فتوات ثانيين. فيه الصين، هو غير مدرك لوزن الصين وأهمية الصين.
عشان كده احنا محتاجين نتكلم برده شوية أرقام مهمين جدا:
- الصين حجم تجارتها مع العالم يا حضرات بيتجاوز الـ 6 تريليون دولار. أكبر دولة بتتاجر مع العالم هي الصين، تجارتها صادرات وواردات مع العالم حوالي 6 تريليون دولار.
- منهم حوالي 3.4 أو 3.6 تريليون دولار صادرات والباقي بقى كام؟ 2.4 تريليون دولار واردات.
- وبالتالي الصين عندها فائض في الميزان التجاري. هي اللي بتغذي العالم بكل احتياجاته.
- 6 تريليون دولار في حين تجارة أمريكا مع العالم حوالي 5.4 تريليون دولار، منهم حوالي 3.2 تريليون دولار واردات و 2.2 تريليون صادرات.
- وبالتالي الميزان التجاري الولايات المتحدة الأمريكية في حالة من العجز. لكن مين صاحب الحصة الأكبر من التجارة العالمية؟ الصين.
عشان كده دي كلها مؤشرات مهمة جدا كان لازم نفكر فيها وهنقول لك اللي ترامب بيعمله بيعمله ليه. لكن عايزين بس نركز مع الأرقام دي شوية:
- الصين تجارتها مع أمريكا تحديدا حجم تجارتها مع أمريكا: احنا قلنا تجارة الصين حوالي 6 تريليون دولار صادرات وواردات مع العالم كله. تجارتها مع أمريكا في حدود 8%.
- كام؟ الصين بتصدر لأمريكا بحوالي 430 مليار دولار صادرات صينية لأمريكا.
- أمريكا بتصدر للصين حوالي 148-150 مليار دولار صادرات أمريكية للصين.
- وبالتالي الميزان التجاري ما بين أمريكا والصين بيعيش عجز. يعني أمريكا محتاجة تدفع أكتر من 300 مليار دولار، الفرق ما بين الصادرات والواردات.
عشان كده ترامب بيقول أنا بعيش العجز 1.2 تريليون دولار. شوف مع الاتحاد الأوروبي، الاتحاد الأوروبي بيصدر لنا بفوق الـ 500 مليار، بيستورد من عندنا بحوالي 300 مليار، وبالتالي احنا بنعيش عجز مع أوروبا، عجز مع الصين، عجز مع باقي مناطق العالم. ده نتيجة أن أمريكا ضحية.
وأظن الفيديو السابق شرح لك مين الضحية ومين الجاني والمجني عليه. ما انت اللي نقلت شركاتك، انت اللي نقلت تجارتك، انت اللي رحت تستخدم الخدامين. عشان كده الفيديو السابق مهم جدا جدا فيه الرد العلمي اللي ما فيش فيه نقاش.
الرد الصيني على قرارات ترامب
لكن هي أمريكا بتدير العالم في فلكها، عايزة العالم يفضل يدور في فلكها. كان طبيعي مع وزن الصين التجاري والفتوة الجديد اللي طالع في الملعب أن الأمور مش هتستمر. عشان كده كان الرد بالمثل من الصين.
الصين عملت إيه انتقامياً؟ "انت فاكر نفسك انت اللي في الملعب لوحدك؟ اصحى يا عم الحاج، ده في فتوات ثانيين. زمان كان ممكن تعمل الكلام ده لما انت كنت اللاعب الوحيد في الملعب، لكن النهاردة احنا موجودين، نحن هنا".
الصين عملت إيه؟ مجلس الدولة الصيني طلع قرار من ساعه. عمل إيه بقى يا باشا؟ نرص بقى مع بعض:
- أولاً: احنا كنا فرضنا جمارك من أول ما الأخ ترامب فرض جمارك علينا في أول ما جه 10% و15%، احنا برده فرضنا 10% و15%. يبقى دي موجوده.
- إيه كمان؟ مجلس الدولة الصيني قرر أولاً فرض ضرائب جمركية على الصادرات الأمريكية بـ 34% إضافية للي فات.
- زي ما انت تقريبا ضريبتك على منتجات الصينية اللي راحه عندك 34% و20% يعني 54% تقريبا، الصادرات بتاعتك اللي جاية عندي هتتنفض حوالي 54%.
- يعني أي صادرات جاية من عندك هتتنفض حوالي 54% طبعا مع الـ 4% وجداد.
ويبدأ حيز التنفيذ من امتى؟ من 10 أبريل. القرارات بتاعة الترامب هتبدأ حيز التنفيذ على الصين من امتى؟ من 9 أبريل. تفهم من حكاية 9 أبريل و10 أبريل أن كل واحد فيهم بيدي الثاني فرصة.
يعني انت ترامب قال أن هيبدأ التنفيذ يوم 9 أبريل، طب هو ليه 9 أبريل؟ أنا في تصوري أن هدفه أنه يقعد على مائدة المفاوضات. ليه ما نفذش من أول يوم الـ 34% اللي فرضها ترامب؟ ليه ما قالش من ثاني يوم لتاريخ صدور القرار؟ علشان نبدأ نتفاوض مع بعض.
ولهذا الصين قالت احنا من يوم 10 أبريل على اعتبار أن لو جه يوم تسعه وترامب نفذ، احنا يوم 10 هننفذ. يبقى كل طرف واضح أنه بيدي للطرف الثاني رسالة: "نحن هنا، أنا واقف، أنا قوي". عشان كده الصين قالت من يوم 10 أبريل لو انت نفذت يوم تسعه احنا يوم 10 هننفذ.
يبقى ده أول حاجة لأن الصين مش قليلة. زي ما انت هتفرض وهتأيدني، أنا هايدك، أنا هقيدك. أنا هقول لك اللي بتعمله الصين واللي بترتبه الصين ومن حولها دلوقتي للالتفاف على عقوبات ترامب.
الحاجة الثانية: فرض عقوبات على 16 شركة أمريكية، حظر التصدير ليها، وفي 11 هيئة أمريكية ممنوع التعامل معاها بالنسبة للسلع الاستراتيجية والسلع الأساسية.
ضيف للقرارات إيه؟ أنه منع تصدير المعادن النادرة اللي بتدخل في صناعات الطائرات والبرمجيات والصناعات الحديثة والصناعات التكنولوجية. "الولايات المتحدة الأمريكية مش انت بتشتغلني؟ أنا هشتغلك أنا كمان".
تداعيات الصراع العالمي والمستقبل
أصل انت بص، لما يبقى فتوة واقف قدام فتوة الموضوع بيبقى له أثر، لكن دول صغيرة مش باينة. الدول الصغيرة قاعدة تتفرج ببقها آه فاتحة، قاعدة تتفرج وبس. هم بيبصوا هنا وهنا. الدول دي لا ناقة لها ولا جمل، لكن الصراع صراع حيتان، صراع كبار بينطحوا في بعض.
في تصوري أن اللي بيتعمل ده زي نظام بقى المعلمين، نظام التجار اللي بيضرب رقم علشان نقعد، تعال عشان نتفاوض وننزل الرقم اللي احنا عايزينه. لكن الصين ما سكتتش، الصين بدأت تتحرك.
دول الاتحاد الأوروبي، اللي هي رجلها مكسرة من يوم حرب روسيا وأوكرانيا والسواد اللي حل على دماغهم بسبب غبائهم الإداري وغبائهم السياسي، وبلع الطعم اللي أكلته لهم أمريكا، والدخول في حرب أوكرانيا والوقوع في المستنقع، وخسارة اقتصادهم وخسارة رفاهيتهم.
كان من ضمن اللي عاقبوا الاتحاد الأوروبي. عشان كده إيه المطلوب أن الاتحاد الأوروبي يعمله؟ نكمل الكلام عن الصين لأن الصين مش ساكتة.
الصين خلال الفترة اللي فاتت فيه مفاوضات واتفاقات ما بين الصين والكوريا الجنوبية واليابان. ودول برده يعتبر من أكبر الشركاء التجاريين مع الولايات المتحدة الأمريكية. اتفقوا أن هم يزيلوا العقبات والمعوقات أمام التجارة ما بينهم وبين بعض.
آه اليابان صحيح قريبة من أمريكا، لكن الصين برده بتحاول تقربها منها. هي بتستخدمكم زي بتستخدم الكل، مش عشان هو أصلا انت لك عيون باينة، أصلا مش عشان سواد عيونك. الموضوع أنها تحصر الصين، عشان تكتف التنين اللي طالع.
لا، ولهذا اللي حصل، قرارات ترامب هي قرارات معادية للعالم كله. ليس من الذكاء أن انت لما تدخل في حرب تحارب الكل. يا أخي ده انت لو عندك ذكاء، نزل كل واحد في المحطة بتاعته.
ما هي ما هو ده في فن الإدارة، أن انت لما تيجي تحارب ما تحاربش الدنيا كلها. لو حاربت الدنيا كلها انت خاسر هذه المعركة. لا، من دلالات الغباء اللي احنا شايفينه أنه حارب الكل بما فيها أصدقائه اللي المفروض يكونوا أصدقائه.
طيب ما كنت تركز الموضوع ده على الصين إذا كانت المشكلة ما بينك وبين الصين، وعايز تضبط الدنيا شوية، وقاعد تقول لي خسائر رهيبة يا حضرات، خسائر تريليونات زي ما بدأنا الكلام.
تأثير قرارات ترامب على الاقتصاد الأمريكي نفسه
ومعتقد أن هو لما يعمل الكلام ده، قعد زي ما صرح من شوية قبل ما ندخل، يقول: "دلوقتي بعد القرارات اللي أنا أخدتها في 6 تريليون استثمارات هتدخل السوق الأمريكي".
استثمارات إيه؟ انت أساسا الضرايب اللي انت فرضتها دي في المقام الأول على شركاتك. والناس طالعة اعتكد الكلام ده دلوقتي اللي احنا قايلينه من ثلاث أيام.
ما هي شركاتك دي اللي راحت فيتنام، وشركاتك دي اللي راحت الصين، وشركاتك دي اللي راحت كوريا، وشركاتك دي اللي راحت الاتحاد الأوروبي، واللي راحت دول آسيا علشان العمالة الرخيصة والأجور الرخيصة.
انت لما تفرض جمارك دي بحوالي 64% ولا 54% علشان الشركات دي ترجع السوق الأمريكي ثاني، طب هترجع السوق الأمريكي ثاني إيه اللي هيحصل؟ كارثة كبرى أخرى للاقتصاد الأمريكي، هو مش واخد باله.
إيه اللي هيحصل؟ أن انت لما الشركات، مش انت هدفك أن انت تعيد الشركات دي مرة أخرى، ماشي، هتعيدها ويمكن تصلح أوضاعك الغلط وتبدأ تشتغل زي بقى خلق ربنا.
بس الإشكالية كبيرة جدا، الإشكالية في إيه؟ انت هتسيب الملعب للآخرين عشان يكبروا. يبقى على نفسها جنت براقش، على نفسها جنت أمريكا.
إيه اللي هيحصل لما الشركات الأمريكية اللي راحت الصين وراحت آسيا وراحت فيتنام وتفرض ضرايب على البلاد دي توصل لـ 47%؟ انت بتفرض على شركاتك، انت شركاتك دي لما تفرض عليها الجمارك دي علشان تيجي السوق الأمريكي هتعمل إيه؟
هتدي أجور غالية ولا مش هتدي أجور عالية؟ المواطن الأمريكي عايز الأجور العالية. عايز إذا كنت بتدفع 5000 دولار للعامل في فيتنام ولا في الصين، انت هتدفع للعامل في أمريكا أكثر من 30-40 ألف دولار.
هتزود تكلفة الإنتاج، وبالتالي هتزود سعر المنتج بتاعك، وبالتالي قدرته على المنافسة في السوق العالمي هتضعف. وبالتالي تركت الفرصة للشركات الأخرى اللي طالعة من الصين ومن آسيا زي شركة تويوتا وشركة سامسونج وشركة بي واي دي وشركة... ما هو انت التكلفة عندك عالية.
مش انت كنت رايح تستخدم خدم؟ أهو انت رجعت عندك مكانك، أولع عندك. هتزود تكلفة الإنتاج وقدرتك على المنافسة حتى في سوق أمريكا هتبقى ضعيفة جدا، لأن تكلفة الإنتاج أصلا عندك عالية.
الخلاصة والتوقعات المستقبلية
وبالتالي هو عمال يعجن ويخبط، وأديك شايف الحصاد لده كله. هو مش مدرك أن قواعد اللعبة تغيرت. عشان كده أنا بقول احنا بنعيش مرحلة مخاض تاريخي.
المرحلة دي تستوجب، أنا في تصوري زي ما احنا قلنا، أهو بدأ الترابط والتقارب الجنوبي الجنوبي أو الشرقي الشرقي. دول الجنوب بتقرب من بعضها، حتى كوريا واليابان، أيوه مع إنهم دول حلفاء تاريخيين مع أمريكا.
مش حبا في سواد عيون الكوريين ولا واليابانيين علشان محاصرة الصين، وكان قبل كده محاصرة الاتحاد السوفيتي. أمال إيه؟ الدول دي رجعت قربت من الصين لأنها لم تنجو من عقوبات ترامب، لم تنجو من الكوارث اللي عملها ترامب. وبالتالي: "آه، لا، ده احنا ندور على مصالحنا الاقتصادية".
وبالتالي الصين تستطيع، احنا قلنا إجمالي صادرات الصين من إجمالي تجارتها صادراتها لأمريكا حوالي 450 مليار دولار. تجارتها 6 تريليون، 450 مليار دول تقدر تضبطهم مع روسيا، مع دول الاتحاد الأوروبي.
عشان كده دول الاتحاد الأوروبي محتاجة أنها تعيد النظر وتعيد ترتيباتها طول ما ترامب شايف الآخرين قدامه. عشان كده الصين ردت، الاتحاد الأوروبي لسه لغاية دلوقتي ما أخدش قرار.
الأيام القادمة حبلى بتطورات كبيرة جدا واحنا متابعين مع بعض. تحياتي لحضراتكم.